Amerikanët zakonisht kanë njërën nga këto tri arsye kur vendosin të zhvendosen në një qytet të ri: një punë e mirë, afërsia me një person të dashur apo edhe klima më e përshtatshme. Gjithsesi, pa marrë parasysh arsyet që mund t’i ketë një person që ndërron qytetin e vendbanimit, tregu i punës dhe cilësia e jetës janë disa nga karakteristikat kryesore që duhet analizuar, para marrjes së vendimit të madh.
Së fundmi është përpiluar edhe lista e qyteteve më të mira për jetesë në Shtetet e Bashkuara të Amerikës, për përpilimin e së cilës janë marrë parasysh një sërë faktorësh, duke filluar nga tregu i punës deri tek cilësia e jetës. Më poshtë ua kemi sjellë dhjetë qytetet e SHBA-së, që zënë pozitat e para, transmeton gazeta Kosova Sot Online.
1. Denver, Kolorado
Numri i popullsisë: 2,651,392 banorë
Çmimi mesatar i një shtëpie: 270,070 euro
Paga mesatare vjetore: 47,560 euro
Në këtë qytet është duke lulëzuar sektori i teknologjisë dhe është një vend shumë i përshtatshëm për të rinjtë, të cilët mëtojnë ta fillojnë karrierën e tyre. Denveri ka njërin prej tregjeve më të shëndosha të punës dhe ka pagë mesatare vjetore mbi mesataren kombëtare, duke qenë më e madhe sesa në disa qytete, ku jeta është shumë më e shtrenjtë.
2. Ostin, Teksas
Numri i popullsisë: 1,835,016 banorë
Çmimi mesatar i një shtëpie: 215,120 euro
Paga mesatare vjetore: 43,160 euro
Kryeqyteti i Teksasit ka shënuar një rritje të shpejtë në vitet e fundit, si në aspektin ekonomik ashtu edhe në atë të popullsisë, meqë numri i popullsisë në vend është rritur për 9 për qind në periudhën 2010-2014. Për më tepër, në këtë qytet organizohen edhe festivale të shumta, që e bëjnë atë një vend të përshtatshëm për turistët, të cilët mëtojnë të kalojnë kohë kualitative, transmeton gazeta Kosova Sot Online.
3. Fejetvill, Arkansas
Numri i popullsisë: 483,396 banorë
Çmimi mesatar i një shtëpie: 158,830 euro
Paga mesatare vjetore: 38,010 euro
Fejetvilli është qyteti më i përballueshëm për banorët e vet në krahasim me të ardhurat mesatare në mbarë kombin. Ky qytet është vendi ku ndodhet Universiteti i Arkansasit dhe i selive të ‘Wal-Mart’-it dhe, për më tepër, është qyteti me rritjen më të shpejtë në Arkansas.
4. Rejllejf-Dërhem, Karolina Veriore
Numri i popullsisë: 1,714,629 banorë
Çmimi mesatar i një shtëpie: 193,365 euro
Paga mesatare vjetore: 45,095 euro
Ky qytet i Karolinës Veriore është më së shumti i njohur për numrin e madh të universiteteve kualitative, gjë që e ka bërë qytetin të dëshirueshëm për banorët e moshës së mesme dhe për akademikë të shumtë. Për më tepër, Rejllejf-Dërhemi është qyteti i dytë sa i përket rritjes së numrit të banorëve nga migrimi, nga të gjitha qytetet në këtë listë.
5. Kolorado-Springs, Kolorado
Numri i popullsisë: 669,070 banorë
Çmimi mesatar i një shtëpie: 198,740 euro
Paga mesatare vjetore: 41,700 euro
Përkundër faktit që është qyteti me rritjen më të vogël të numrit të popullsisë nga migrimi, nga të gjitha qytetet në këtë listë, Kolorado-Springs renditen në pozitën e pestë sa i përket qyteteve më të përshtatshme për jetesë pasi që ka një pagë mesatare shumë të pëlqyer si dhe jeta në këtë qytet është e përballueshme për shumicën e banorëve.
6. Bojis, Ajdaho
Numri i popullsisë: 639,616 banorë
Çmimi mesatar i një shtëpie: 208,400 euro
Paga mesatare vjetore: 37,240 euro
Qyteti më i populluar i Ajdahos është edhe qyteti me shkallën më të ultë të krimit nga të gjitha qytetet e mëdha. Ndonëse është një qytet relativisht i ulët, Bojisi ka një shkallë të ulët të papunësisë, gjë që e bën atë tejet të dëshirueshëm.
7. Sietëll, Uashington
Numri i popullsisë: 3,557,037 banorë
Çmimi mesatar i një shtëpie: 324,895 euro
Paga mesatare vjetore: 53,000 euro
“Amazon”, “Starbucks” dhe “Microsoft” janë vetëm disa nga gjigantët të cilët gjinden në Sietëll dhe e bëjnë këtë qytet njërin nga qytetet me tregjet e zhvilluara të punës. Tash e një kohë të gjatë Sietëlli ka arritur të zë vend në dhjetë qytetet më të dëshiruara nga banorët e Shteteve të Bashkuara të Amerikës.
8. Uashington D.C.
Numri i popullsisë: 5,863,608 banorë
Çmimi mesatar i një shtëpie: 336,750 euro
Paga mesatare vjetore: 59,060 euro
Uashingtoni është qyteti me tregun e tretë më të zhvilluar të punës në nivel nacional, duke pasur vetëm San Hosenë dhe San Franciskon para. Për më tepër, një masë e madhe e popullsisë së këtij qyteti kanë diploma universitare, që domosdoshmërisht e rritin cilësinë e jetës në këtë qytet, transmeton gazeta Kosova Sot Online.
9. San-Francisko
Numri i popullsisë: 4,466,251 banorë
Çmimi mesatar i një shtëpie: 579,260 euro
Paga mesatare vjetore: 62,160 euro
Me një treg të shëndoshë pune dhe me paga të larta, lidhjet e San Franciskos me industrinë e teknologjisë e bëjnë atë një qytet të dëshirueshëm për një numër të madh amerikanësh. Për më tepër, në këtë qytet ndodhen edhe disa nga universitetet më të shquara të SHBA-së, ndërsa, një mangësi e të jetuarit në këtë qytet është kostoja e lartë e jetesës.
10. San Hose, Kaliforni
Numri i popullsisë: 1,898,457 banorë
Çmimi mesatar i një shtëpie: 696,990 euro
Paga mesatare vjetore: 67,915 euro
Duke qenë kryeqendër e Luginës së Silikonit, San Hose shquhet për tregun e punës dhe për të ardhurat mesatare të banorëve të vet. Për më tepër, në këtë zonë gjenden edhe shumë kolegje e universitete të shquara, që, natyrisht, janë më tepër të përqendruara në fushën e teknologjisë. Megjithatë, kostoja e lartë e jetesës në këtë qytet ka bërë që San Hose të renditet në pozitën e dhjetë të kësaj liste.
(Kosova Sot)
Leave a Reply